કર્તા પરિચય:

દિગીશ નાનુભાઈ મહેતા (૧૨-૭-૧૯૩૪, ૪-૫-૧૯૯૧): નિબંધકાર, નવલકથાકાર, વિવેચક. જન્મ પાટણમાં. પ્રાથમિક – માધ્યમિક શિક્ષણ સિદ્ધપુરમાં. ૧૯૫૩માં અંગ્રેજી-મનોવિજ્ઞાન વિષયો સાથે બી.એ. ૧૯૬૮માં યુનિવર્સિટી ઑવ લિડ્સમાંથી એમ.એ. ગુજરાત યુનિવર્સિટીના ભાષાસાહિત્ય ભવનમાં અંગ્રેજીના પ્રાધ્યાપક અને ત્યાંથી જ નિવૃત્ત.

પ્રયોગશીલ નવલકથાકાર, નિબંધકાર તેમ જ વિવેચક તરીકે પ્રસિદ્ધ છે. પ્રણયકથાને અરૂઢ સ્વરૂપે રજૂ કરતી તેમની નવલકથાઓ જીવનના અનેક મર્મોને, હાસ્ય-મજાકની વિલક્ષણ શૈલી વડે લીલયા ઉદઘાટિત કરે છે. નિબંધમાં વસ્તુ કે પાત્રને ચિત્રાત્મક ઉઠાવ આપવાની શક્તિ તેમનામાં છે. તો એમના વિવેચનોમાં પણ એમની અભ્યાસનિષ્ઠા અને નિજી દૃષ્ટિનો પરિચય થાય છે.