કર્તા પરિચય:

શેખ આદમ મુલ્લાં શુજાઉદ્દીન આબુવાલા, ‘શેખાદમ’ (૧૫-૧૦-૧૯૨૯, ૨૦-૫-૧૯૮૫): કવિ, નવલકથાકાર. અમદાવાદમાં જન્મ. ગુજરાતી વિષય સાથે અનુસ્નાતક. ‘ગુજરાત સમાચાર’માં પત્રકાર તરીકે કારકિર્દીની શરૂઆત. સામ્યવાદી યુવક મહોત્સવ નિમિત્તે મોસ્કો ગયા. ત્યાંથી પોલેન્ડ થઈને ૧૯૫૬થી ૧૯૭૪ સુધી પશ્ચિમ જર્મનીમાં નિવાસ. ત્યાં ‘વોઈસ ઑફ જર્મની’માં હિન્દુસ્તાન રેડિયો વિભાગમાં હિન્દી-ઊર્દૂ સર્વિસનું સંચાલન કર્યું. ભારતમાં પરત આવ્યા પછી પત્રકાર રહ્યા. આંતરડાની બીમારીથી અવસાન.
લોકપ્રિય ગઝલકાર છે. પરંપરિત ગુજરાતી ગઝલના વિકાસમાં ગઝલલેખન અને મુશાયરાપ્રવૃત્તિ દ્વારા તેમણે નોંધપાત્ર પ્રદાન કર્યું છે. સરળ, બોલચાલની ભાષામાં લખાયેલી એમની રંગદર્શી ગઝલો ખૂબ જ લોકપ્રિય બની છે. ‘ચાંદની’ (૧૯૫૩), ‘સોનેરી લટ’ (૧૯૫૯) વગેરે ગઝલસંગ્રહો તેમ જ કટાક્ષકાવ્યસંગ્રહ ‘ખુરશી’ નોંધપાત્ર છે.