ખંડ 1

મધ્યકાળ

આવૃત્તિ : બીજી કુલ પૃષ્ઠ 24+584

કોશના આ ખંડ-1માં ઈ. સ. 1150થી 1850 સુધીના સમયગાળામાં થયેલા કવિઓ અને તેમની રચનાઓ વિષયક તમામ વિશ્વાસપાત્ર માહિતી આપવામાં આવી છે. આ કોશમાં મધ્યકાલીન સાહિત્યમાં રચાયેલી, કાવ્યગુણે ઉત્તમ, મનુષ્યજીવનના રહસ્યોને ઉકેલવાની ચાવીઓ પૂરી પાડતી અને મુદ્રિત સ્વરૂપે મળતી કૃતિઓના સંખ્યાબંધ અધિકરણ ઉમાશંકર જોશી, હરિવલ્લભ ભાયાણી, જયંત કોઠારી, ચંદ્રકાંત શેઠ વગેરે જેવા તજ્જ્ઞોએ લખ્યા છે. મધ્યકાળમાં જે સાહિત્ય રચાયું છે તે તમામ ને એકસાથે સંગ્રહી લેવાનો અહીં પ્રયત્ન છે. અહીં જૈન, સ્વામીનારાયણ, નાથસંપ્રદાય વગેરેના 1600 જેટલા કવિઓની 3000 ઉપરાંત સાહિત્યરચનાઓ વિશેના અધિકરણના મળશે. આ બધા જ અધિકરણ નિષ્ણાત સંશોધકોએ તૈયાર કર્યા છે.

આ ઉપરાંત અહીં કવિ કે કૃતિવિષયક મળતી તમામ સામગ્રીનો સંદર્ભ પ્રત્યેક અધિકરણને અંતે આપવામાં આવ્યો છે જે અભ્યાસીને સામગ્રીના મૂળ સુધી લઈ જશે.

ખંડ 2

અર્વાચીન કાળ

બીજી આવૃત્તિ : પ્રકાશ્ય

કોશના આ ખંડ-2ની પહેલી આવૃત્તિમાં ઈ. સ. 1850થી ઈ. સ. 1950 વચ્ચે જન્મેલા કર્તાઓ અને તેમની કૃતિઓ વિશે સઘળી માહિતી આપવામાં આવી હતી. બીજી આવૃત્તિમાં ઈ. સ. 1970 સુધીમાં જન્મેલા લેખકોને અને એમની રચનાઓને સમાવવામાં આવ્યા છે.

કવિતા, ટૂંકીવાર્તા, નવલકથા, એકાંકી, નાટક, નિબંધ, ચરિત્રકથા, પ્રવાસકથા, વિવેચન વગેરે લલિતસાહિત્યના પ્રકારમાં થયેલું કોઈપણ સર્જન એકસાથે સંગ્રહી લેવાનો અને સર્વગ્રાહી પ્રયત્ન આ કોશમાં થયો છે.

એ રીતે આ કોશ ગુજરાતી લેખકોની શક્ય એટલી સર્વાશ્લેષી સૂચિ આપતો માહિતી ગ્રંથ છે. અર્વાચીનકાળમાં ગુજરાતી સાહિત્યના વિવિધ પ્રકારોમાં પ્રદાન કરનારા 1970 સુધીના લગભગ બધા જ કર્તાઓનું પ્રતિનિધિત્વ અહીં ઉપસે છે.

કર્તાઓ અને કૃતિઓના મળીને 12000 હજાર જેટલા અધિકરણ અહીં અકરાદિક્રમમાં સંપાદિત થયા છે.

ખંડ 3

સાહિત્યિક પ્રકીર્ણ

બીજી આવૃત્તિ : પ્રકાશ્ય

કોશના આ ખંડ-3માં ગુજરાતી ભાષા અને સાહિત્યના ઉદભવ અને વિકાસનો ઇતિહાસ ગુજરાતી સાહિત્યપ્રકારો અને તેની ઉત્ક્રાંતિ, સાહિત્યશાસ્ત્રના વિભાવનાત્મક પાસાંઓ, સાહિત્યિકવાદો, સાંસ્કૃતિક સંદર્ભો, આધારગ્રંથો, સાહિત્યિક પારિતોષિકો, સાહિત્યિક સામયિકો વગેરે ગુજરાતી ભાષાસાહિત્યના વિકાસવિસ્તારમાં ફાળો આપનારા મહત્વના પરિબળો વિશે અધિકરણ આપવામાં આવ્યા છે.

આ ખંડની બીજી આવૃત્તિમાં કેટલાક નવા વિભાવો વિશે અધિકરણ ઉમેરીને કોશને સંવર્ધિત કરવામાં આવ્યો છે.

કોશ જોવામાં સહાયક એવો અધિરકણનો શબ્દનુક્રમ પૃષ્ઠનિર્દેશ સાથે આરંભમાં જ જોડ્યો છે. નિષ્ણાત અધિકરણ લેખકોએ તૈયાર કરેલા ગુજરાતી સાહિત્યના આ ત્રણ અધિકૃત કોશગ્રંથ છે. જે વિદ્યાર્થીઓ, અધ્યાપકો અને વિષયના રસિક સંશોધકો તથા તજ્જ્ઞોને સંશોધન કરવા માટે સહાયક આધારગ્રંથો છે.

નવા પ્રકાશનો (પુનમુર્દ્રણ)

1. ગુજરાતી સાહિત્યકોશ ખંડ-1
2. ગુજરાતી સાહિત્યકોશ ખંડ-3
3. ગુજરાતી સાહિત્યનો ઇતિહાસ ગ્રંથ-1
4. ગુજરાતી સાહિત્યનો ઇતિહાસ ગ્રંથ-2-1
5. ગુજરાતી સાહિત્યનો ઇતિહાસ ગ્રંથ-2-2
6. ગુજરાતી સાહિત્યનો ઇતિહાસ ગ્રંથ-3
7. ગુજરાતી સાહિત્યનો ઇતિહાસ ગ્રંથ-5
8. ગુજરાતી સાહિત્યનો ઇતિહાસ ગ્રંથ-6
9. ગુજરાતી સાહિત્યનો ઇતિહાસ ગ્રંથ-7